أمين سنادة
مابعد مجزرة فض الاعتصام والجو متوتر قررنا أن نقيم عدة ندوات بإحياء بورتسودان وكان تكليفى أن أتحدث في سوق سلبونا ورغم سعادتي بالتكليف ولكن لم يفارقني التوتر إطلاقا فقد كانت الأجواء متوترة فبورتسودان غير ماحدث في ميدان الاعتصام كانت تواجه بدايات النزعات المجتمعية وانا سارح في هذه الخواطر اسمع اسمي يقدمه شاب بصوت قوى ويسبق التقديم بتحليل سياسي واعي حتى تمنيت أن يكون هو المتحدث فلم أملك إلا سألت استاذنا عبد العزيز مختار
(الشاب دة منو)
فاجابني دة شاب اسمو حسن بابكر
عندما قرر تجمع المهنين أن يتم تنفيذ الإضراب السياسى وبرضو قبل موكب 30 يونيو كنت متابع نقاش قدام رئاسة المواني بين اتنين من عتاة النقابيين
النقابى الأول للثاني وهو يشير باصبعه لشاب
تعرف الشباب ديل رغم انهم متحمسين لكن عاجبني فيهم الشاب دي اول حاجة فيهو ودود جدا ومهذب تاني حاجة حريص جدا انو يشرح فكرة الإضراب بشكل صحيح وعندو قدرة عجيبة على الحوار بدون تعصب وفوق دا كلو متفاني ومنظم جدا شكلو ماغريب على الشاب دة لكن ماعرفتو منو
النقابى الثاني ياسلام ياخ كيف ياخ دة شاب ممتاز جدا من اولاد سلبونا اسمو حسن بابكر
حسن حنين ومنصور يتونسوا في الاتحاد ومنصور يقول لحسن حنين
ياحسن حنين ياخ الشاب الجديد دة اسمو منو؟
حسن حنين منو في الشباب اليومين ديل الاتحاد دة مليان شباب جداد
منصور ياخ الشاب البنغني لياسر إبراهيم ورغم انو يادوب دخل الاتحاد لكن عندو إصرار انو يكون عندو اغاني خاصة وطوالي في حالة بروفة ومابتلقي قاعد ساي ياببرف يابقول في كلام مفيد لكن بالله الشاب دة اسمو منو؟
حسن حنين ياسلام الشاب دة خريج بورتسودان الأهلية واسمو حسن بابكر
أمس وبعد حادثة القرنيت ارسل لي أحد الأصدقاء صورة حسن بابكر ومعاها السؤال الذي اعتقد انه اصبح يخص حسن بابكر
الشاب دة منو ياامين؟ القاعد تبكي فيه الدنيا كلها
فكتبت بدموعي ايوة والله بكيت بكيت طويلا
دة حسن بابكر خريج الأهلية وعضو تجمع العمال والموظفين بهيئة المواني وعضو اتحاد الأدباء والفنانين والفاعل والناشط بلجان المقاومة ولجنة الخدمات والتغيير
وداعا حسن بابكر
