كلمة ونص!!!
وعد الحق امين
في حضرة الملك (جمال فرفور)
اجتهد …وقاتل ..وصبر….موهبة تعرضت لظلم ومحاولات بائيسه للدخول في معركة دون معترك كان الهدف منها إقصاءه من المشهد الفني وازاحته من عرش النجومية المطلقة….فلن يتمكنوا (الخبثاء) منه وصاروا في نهاية المطاف..(معجبين) وذلك كان الانتصار الحقيقي..صوت مشبع بالطرب ومكتنز. بالحيوية ..صاحب حنجرة ذهبية تنقل بسلاسة الدهشة…كيف لا وهو يفرض اسمه بقوة ويتنافس بشراسة حتي أصبح(من الارقام المميزة ) ..يمتلك بصمة فريدة وخامة صوتية تستحق ان تجاز وتضمن في مقررات كلية الفنون…صاحب احساس مختلف ..فنان شاب يستحق أن نستثنيه تماما من صفة(الفنان الشاب،) وان ندرجه ضمن زمرة (الكبار ) ليس سنا ولكن عطاءا…فهو أحد أهم الفنانين في السودان الذين اسهموا وبشكل ملحوظ في الحفاظ علي هوية المسامع السودانية…ذلكم هو الفنان المدلل حبا وابداعا الأستاذ جمال فرفور (الملك) كما يحلو لنا ، جمال فرفور في بداياته وقبل أن يتمرد علي ترديد أغنيات الآخرين استطاع إقناع جمهوره باغنياته الخاصة ذلك النهج الذي ضاعف من احترام الكثيرين وأضاف من رصيده الفني واسهم وبشكل كبير في منحه كل تلك النجومية خصوصا وأن اغلب أعماله الخاصة جاءات بعيدة تماما عن الرداءه والابتذال و (الانحطاط) ،تعرض فرفور لهجوم كبير من بعض (الحاقدين) من زملائية بالوسط الفني…كان الهدف منها اقصاءه من المشهد الفني وازاحته من عرش النجومية المطلقة…أولئك الذين يشمل لهم فرفور (بعبعا) مخيفا يهدد(عروشهم الفنية المتهالكة ) والتي قاموا ببنائها في غفلة من الرصانة والموهبة الحقيقة ….اعتقد ان أولئك وبعد ما شاهدوه حفلاته الأخيرة والمستمرة بليالي البروف سيحتاجون لوقت طويل جدا حتي يستفيقوا من (الصدمة) ..قبيل ان يعودوا من جديد لنسج المؤامرات والدسائس ويبذلون مجهودا إضافيا في سبيل تعطيل مسيرة نجاح ذلك الشاب…وللغرابة يتعامل معهم علي طريقة المثل الشهير “الكلب ينبح …والملك ماشي)
جمال فرفور حافظ كمية من الغناء البيخليهو عندو مقدرة غريبة علي التحكم في المزاج العام بالإضافة لطلته الحلوة وعندو (هيبة حقيقة) ما مصنوعة بيعرف متين (يغني) شعبي ومتين يغني حقيبة ومتين يغني هجيج، بالإضافة لي العلاقة الحلوة بينو وبين الفرقة الموسيقية يلا العلاقة دي بتخلي مزاج العازفين رايق..وبتنقلهم من إطار الوظيفة الضيق لا إطار(المتعة الواسع)
الحاجة البتميز فرفور انو عارف تماما (إطار النجومية ) المفروض يغني فيهو وما يطلع منو لان هو الاداهو (الهوية الفنية) ..ودي مشكلة بتواجه فنانين وفنانات كتار جدا ..بيحاولوا دائما يطلعوا من الأطار دا وبيتعرضوا لفشل ذريع…
اخيرا جمال فرفور دا (غناي ) ولما يقولوا ليك الزول دا غناي معناها بطرب روحو قبل الجمهور…وطبعا دي حاجة ظاهرة شديد في فرفور…تتفقوا معاها ولا تختلفوا..حاليا هي الفنان الوحيد البيديك الاحساس الحقيقي للغناء..يمتلك صوت (ثابت.).وتطريب (عالي) وحفظ متقن لاصعب الأغنيات ودا كلو (كوم) ..والحب البتلقاهوا فرفور من جمهورها دا (كوم )تاني.
كسرة:
بنحبك يا (ملك)
