كلمة ونص!!! وعد الحق امين (عشة الجبل) نموذج حقيقي لفنانة شابة استفادات من النقد… وقدرت تطلع من متاهه(بله الدق الرقم جلا)

كلمة ونص!!!
وعد الحق امين
(عشة الجبل) نموذج حقيقي
لفنانة شابة استفادات من النقد…
وقدرت تطلع من متاهه(بله الدق الرقم جلا)

عشة الجبل نموذج حقيقي لفنانة شابة قدرت تستفيد من الغلطات الارتكبتها في بداية مشوارها الفني ود المطلوب ..كلنا بنغلط بس كيف نصحح غلطاتنا وكيف نقدر نعمل حاجز بينها وبين تكرارها مرة ثانية قبل كذا شهر وجهت انتقادات بالجملة لعشة الجبل بسبب بعض سلوكياتها الخاطئة الكانت ممكن تدمر موهبتها والليلة انا شايفها بتطور من يوم لي يوم لازم برضو اكون حقاتي واشيد بيها لان دي المهنية بتقتضي كدا..يعني ما معناها اننا انتقدنا فنان او فنانة قبل كدا ما نكتب عنو حاجة سمحة لما يتطور ويعالج سلبياتو…النقد أساسا الهدف منو تطوير الفنان ولفت نظرو للسلبيات الممكن تهدد مسيرتو الفنية ، استغرب جدا لحال بعض مصطادى الماء العكر من(المندسين) الذين ظلوا يحاولون زرع الكراهية في قلوب محبي ومعجبي ذلك الفنانة ضدي ، ويوهمونهم بانني استهدفها …الليلة حابي اتكلم عن الفنانة عشة الجبل…واحدة من الفنانات الوجهت ليهن نقد كتير ..بس عمرها ما اتضجرت او اتضايقت من النقد بالرغم من اطلاق بعض من (المندسين) خبرا يؤكد فيه أن تلك الفنانة قامت بفتح بلاغ في مواجهتي بسبب مقال لي أتذكر انتي تلقيت اتصالا هاتفيا في ذلك الوقت من عشة الجبل تنفي كل ما تداولته الصحف من خبر فتح بلاغ في مواجهتي.. عشة الجبل كانت بتستفيد من اي كلام يكتب عنها في اي جريدة او نافذه اسفيرية ودي الحاجة الخلتها تتطور بسرعة الصاروخ وفي زمن قياسي قدرت تحجز لنفسها موقع مميز جدا وسط الصف الأول من الفنانات السودانيات، بتذكر قبل عام ..في بدايات عشة الجبل حذرتها من مغبه الطريق الكانت ماشه فيهو بتاع ((غناء السوق )) وقلت ليها وبكل وضوح الطريق دا بيوصلك سريع لكن ح تكون مجرد (فورة اندروس) وأعتقد رسالتي ديك وغيرها وغيرها من بعض الزملاء في الوسط الإعلامي وصلت ليها واتعاملت معاها باهتمام كبير جدا وقدرت تحاول تطلع من لونية (الزنق والهرجلة) واستفادات من الخامة الصوتية الذي تمتلكها واستطاعات ان تنجح في تجربة ولونية جديدة بأعمال خاصة وأغاني الرواد حاليا عشة الجبل مطلوب منها ان تعلم جيدا ان هذه المرحلة هي أخطر مراحل تجربتها الفنية بشكل عام لذلك عليها ان تكون ذكية وان تستفيد من التجارب التي سبقتها وان تحرص علي عدم تكرار اخطائيها والاستفادة بالمقابل بدون الإمكان من ايجابياتها والتعامل بجدية مع متطلبات المرحلة .وتلك مشكلة حقيقية تواجه كثير من الفنانين والفنانات..شخصيا ، ساظل من الداعمين لعشة الجبل طالما اختارت الطريق الصحيح وسلك الصواب فهي موهبة وتستحق الدعم والمؤازرة ف(إثارة الجدل ) مراه مكسورة ، كلما نظرت فيها وجدت جزءا من ملامحك مفقودة!!! لان التاريخ لا يرحم، ولا نحن كذلك

كسرة:
بالتوفيق عشة الجبل…ومزيد من النجاحات بدون اي (اشتباكات)

خارج النص:

عزيزي الفنان…ما تتعامل مع النقد كاستهداف..نحن لا دايرين(نقاسمك) مسرح . .ولا نجابدك في (عداد)